Svenske feministar stiller til EU-val

- Behovet for eitt feministisk alternativ i riksdagen har auka ytterlegare etter det førre valet i Sverige, skriv partistyre i ei pressemelding som vart presentert i Stockholm i dag.

Styret har laga følgjande tre forslag som skal opp i ekstrakongressen partiet skal halde i mai:

• FI skal stille opp i valet til EU-parlamentet i 2009.
• FI skal stille opp i riksdagsvalet 2010.
• Feministar i alle kommunar og län kringom i Sverige skal oppmodast til å stille opp i kommune- og landstingsvalet 2010 under partinamnet Feministiskt initiativ.

Heilomvending

Ved riksdagsvalet i 2006 fekk Feministiskt initiativ 37 954 røyster. Det tilsvarte ikkje meir enn 0,68 prosent, og var mykje mindre enn det medlemmane i partiet hadde sett for seg.

I februar i fjor melde tidsskriftet Riksdag og departement at partiet høgst truleg ikkje kom til å stille opp i fleire val. Feministiskt initiativ vurderte då å gå over frå parti til å verte ei folkerørsle, vart det sagt. Dårleg økonomi skal ha vore hovudårsaka.

- Vi klarte oss gjennom den førre valkampen takka vere eit stort pengebidrag frå ein sympatisør. Det kan vi ikkje rekne med i framtida, sa styrerepresentant Stina Sundberg i Feministiskt initiativ den gongen.